*||श्री गजानन समर्थ||*
कितीक सरले कितीक उरले,
आयुष्याला मोजु नका.
मस्त जगूया आनंदाने,
मंत्र मुळी हा सोडू नका.
*गण गण गणात बोते!*
नाही पटले काही जरीही
उगाच क्रोधीत होऊ नका.
व्यक्ती तितक्या विचारधारा,
मंत्र मुळी हा सोडू नका.
*गण गण गणात बोते!*
योग्य अयोग्य चूक बरोबर,
मोजमाप हे लावू नका.
विवेक बुद्धि प्रत्येकाला,
मंत्र मुळी हा सोडू नका.
*गण गण गणात बोते!*
सुख दुःख हे पुण्य पाप ते,
दैव भोग हे तोलू नका.
कर्म फळाच्या सिद्धांताचा,
मंत्र मुळी हा सोडू नका.
*गण गण गणात बोते!*
खाण्या बाबत हट्टी आग्रही,
कधी कुठेही राहू नका.
खाऊ मोजके राहू निरोगी,
मंत्र मुळी हा सोडू नका.
*गण गण गणात बोते!*
संस्कारांचे मोती उधळले,
पैसा शिल्लक ठेवू नका.
पैसा करतो आपले परके,
मंत्र मुळी हा सोडू नका.
*गण गण गणात बोते!*
मत आपले,विचार,
सल्ला,
विचारल्या विण देऊ नका.
मान आपला आपण राखा,
मंत्र मुळी हा सोडू नका.
*गण गण गणात बोते!*
नित्यच पाळा वेळा सर्व
वेळी अवेळी जागू नका.
पैशाहुनही अमूल्य वेळा,
मंत्र मुळी हा सोडू नका.
*गण गण गणात बोते!*
नाही बोलले कुणी तरीही,
वाईट वाटुन घेऊ नका.
मौन साधते सर्वार्थाला,
मंत्र मुळी हा सोडू नका.
*गण गण गणात बोते!*
जगलो केवळ इतरांसाठी,
कुठेच आता गुंतू नका.
फक्त जगुया आपल्यासाठी,
मंत्र मुळी हा सोडू नका.
*गण गण गणात बोते!*
जाणा कारण या जन्माचे,
वेळ व्यर्थ हा घालू नका.
श्वासोश्वासी नामच घ्यावे,
मंत्र मुळी हा सोडू नका.
*गण गण गणात बोते!*
*श्री सद्गुरू गजानन महाराज की जय !!* ......
No comments:
Post a Comment
im writing under "Comment Form Message"